درد کی ایک زور دار لہر اس کے چہرے سے دل تک دوڑ گئی، اس قدر درد اسے چہرے پر پڑے تھپڑ سے نہیں ہوا تھا، جتنا الفاظ اور بڑے ماموں کا لہجہ اس کا دل کاٹ گیا تھا مگر بڑے ماموں اس کی حالت سے بے نیاز بولے جارہے تھے۔
تیرا باپ مرگیا تھا تو کسی قابل نہیں تھا تو گدھے۔
یہ کیا سوچ کر لکھتا ہے ۔۔۔ کون سا غم ہے تجھے؟ کیا روگ لگا رکھا ہے۔۔۔ ؟
ہمیں بھی بتا ہم بھی تیرے ساتھ مل کر روتے ہیں ۔۔۔ بے غیرت۔۔۔!
بڑے ماموں کوئی لحاظ رکھے بغیر اسے بری طرح لتاڑ رہے تھے ۔۔۔ یہ دیکھو ۔۔۔ یہ کیا ہے بتاؤ۔۔۔؟
عشق تماشا لگا رکھا ہے یہاں
اِک چاہتوں کی سرکس میں
یہ ۔۔۔ یہ کیا ہے ۔۔۔ بتانا
بڑا تو مہیوال۔۔۔
یہ جو ڈائری کے ہر دوسرے صفحے پر تو نے لکھ رکھا ہے نا۔۔۔رنجشوں کے نصاب سے چاہتوں کے اقتباس۔۔۔
کون سے رنجشیں ہیں تیری زندگی میں۔
اتنے پیار سے تیری ہر خواہش پوری کرتے ہیں ۔۔۔ اچھا کھانا ۔۔۔ اچھی رہائش۔
سب کتنا پیار کرتے ہیں اور کتنا خرچہ ہے تیری انجینئرنگ کا ۔۔۔ اور تو ہے کہ کتے کی دُم۔
سائنسدان کی اولاد ۔۔۔!
بہت بڑا فلاسفر سمجھتا ہے تو خود کو ۔۔۔ انجینئرنگ پڑھ کر جناب فلسفے لکھیں گے۔
ماموں آپ نے بھی تو سول انجینئرنگ پڑھ کر بزنس کیا ۔۔۔ آپ نے بھی تو اپنی فیلڈ چھوڑ دی۔
شہر کے نامور بزنس مین، معاملہ فہم انسان حسین بزدار کو جواب دیا گیا تھا۔
کچھ پل وہ غور سے اپنے بھانجے کو دیکھتے رہے۔
اب تو مجھے جواب دے گا۔۔۔
بے غیرت اوقات دیکھ اپنی۔۔۔
اور پھر انہوں نے اس پر لاتوں گھونسوں کی برسات کردی۔
*****______-------********_______---------
آج شہر کے کامرس کلب کی جانب سے عشائیہ دیا گیا۔
مہمان خصوصی حسین بزدار کو دعوت دی گئی کہ آکر اپنے خیالات کا اظہار کریں۔
بزنس کے فروغ کیلئے سب سے پہلے آپ یہ بھول جائیے کہ دنیا کیا کہے گی۔۔۔ اور بس اپنے اندر کے ضبط کو آزمائیں، نقصان ہو تو گھبرائیں مت بلکہ وہ نقصان کیوں ہوا اُس سبق کو تلاشیں۔
اگر وہ سبق مل جائے تو ڈوب جانے والا سرمایہ، ضائع گیا وقت نقصان نہیں لگے گا بلکہ آپ نے بہت کم قیمت میں بیش قیمت تجربہ لے لیا۔
کوئی بھی پیدائشی بزنس مین، سرمایہ دار، صنعت کار نہیں ہوتا۔۔۔ وقت، معاشرہ، حالات ان تمام سے لڑکر اپنی حیثیت خود منوانی پڑتی ہے، بشرط یہ کہ آپ خود اپنے ساتھ کھڑے رہیں۔
اور پورا حال ان کے جہاندیدہ مشوروں اور بے بہا تجربوں سے پر باتوں پر تالیاں پیٹ رہا تھا۔
ساحر مرزا کے قلم سے
No comments:
Post a Comment